DOST könüllüləri üçün məişət zorakılığı ilə mübarizə sahəsində təlim keçilib

Əmək və Əhalinin Sosial Müdafiəsi Nazirliyinin tabeliyində Sosial Xidmətlər Agentliyi tərəfindən DOST könüllülərinə məişət zorakılığı ilə mübarizə sahəsində təlim keçilib.  

Təlim müvafiq sahədə maarifləndirmə tədbirlərinin təşkili prosesinə könüllülərin cəlb edilməsi məqsədi daşıyıb. İştirakçılara məişət zorakılığının hüquqi, sosial və psixoloji aspektləri izah edilib, zorakılığa məruz qalan şəxslərlə işləmə bacarıqlarının formalaşdırılması və müdafiə mexanizmləri haqqında məlumatlar verilib. 

Təlim zamanı məişət zorakılığının növləri, yaranma səbəbləri və risk amilləri müzakirə olunub. Eləcə də, “Məişət zorakılığının qarşısının alınması haqqında” Azərbaycan Respublikasının Qanunu, mühafizə orderlərinin tətbiqi mexanizmi, sığınacaqlar və sosial xidmət imkanlarından danışılıb. Könüllülər zorakılığa məruz qalan şəxslərin müraciət edə biləcəyi qaynar xəttlər barədə də məlumatlandırılıb.

Təlim interaktiv formada təşkil olunub, iştirakçılarla real situasiyaların müzakirəsi aparılıb və onlara qrup tapşırıqları verilib.