Özbəkistan nümayəndə heyətinə ölkəmizdə aparılan sosial islahatlar barədə məlumatlar verilib

Özbəkistan Respublikasının Prezidenti yanında Milli Sosial Müdafiə Agentliyinin sədr müavini Cəmşid Abruyevin başçılıq etdiyi nümayəndə heyəti Əmək və Əhalinin Sosial Müdafiəsi Nazirliyinin tabeliyindəki DOST Rəqəmsal İnnovasiyalar Mərkəzində, Dövlət Sosial Müdafiə Fondunda, Sosial Xidmətlər Agentliyində və Dövlət Tibbi-Sosial Ekspertiza və Reabilitasiya Agentliyində olub.

Nümayəndə heyətinə son illər dövlət sosial xidmətlərinin elektronlaşdırılması, pensiya təminatı və sosial sığorta sahələrində aparılan islahatlar və əldə olunan uğurlar barədə məlumat verilib. Azərbaycanın sosial xidmətlər sistemi, bu sistemin təkmiləşdirilməsi və əhatə dairəsinin genrişləndirilməsi istiqamətində atılan addımlar, “Azərbaycan Respublikasında sosial xidmətin inkişafına dair 2023-2026-cı illər üçün Dövlət Proqramı”nın  hədəfləri diqqətə çatdırılıb. 

Ölkəmizdə əlillik və reabilitasiya sisteminin qabaqcıl beynəlxalq təcrübə əsasında inkişaf etdirilməsi, müasir reabilitasiya infrastrukturunun qurulması və reabilitasiya xidmətlərinin keyfiyyətinin yüksəldilməsi istiqamətində son beş ildə həyata keçirilən islahatların nailiyyətləri barədə məlumat verilib.

Görüşlər zamanı qeyd olunan sahələrdə  gələcək əməkdaşlığa dair fikir mübadilələri aparılıb.