Şəhidlərimizin ailə üzvləri doğum günlərində ziyarət ediliblər

Əmək və Əhalinin Sosial Müdafiəsi Nazirliyinin tabeliyində Sosial Xidmətlər Agentliyinin əməkdaşları Vətən müharibəsi şəhidi Fərhad Əliyevin anası Tacə Vahabovanı və Birinci Qarabağ müharibəsi şəhidi Barat Rzayevin həyat yoldaşı Elmira Mehralıyevanı doğum günlərində ziyarət ediblər. 

Vətən müharibəsi şəhidi Fərhad Əliyev Azərbaycan Ordusunda müddətdən artıq həqiqi hərbi xidmət hərbi qulluqçusu kimi xidmət edib. 19.11.2020-ci il tarixində Xocavənd uğrunda gedən döyüşlərdə qəhrəmancasına şəhid olub. 

Prezident İlham Əliyevin müvafiq Sərəncamları ilə “Xocavəndin azad olunmasına görə”, "Füzulinin azad olunmasına görə" və “Vətən uğrunda” medalları ilə təltif edilib. 

Birinci Qarabağ müharibəsi şəhidi, kapitan Barat Rzayev 26.03.1993-cü il tarixində Qazax rayonunda gedən döyüşlərdə şəhid olub. 

Şəhidimizin həyat yoldaşı Elmira Mehralıyeva Əmək və Əhalinin Sosial Müdafiəsi Nazirliyi tərəfindən Tovuz rayonunun Abulbəyli kəndində ikiotaqlı fərdi evlə təmin edilib. 

Agentliyin əməkdaşları Tacə Vahabovanı və Elmira Mehralıyevanı doğum günləri münasibətilə təbrik edib, onlara möhkəm can sağlığı arzu ediblər. Şəhidlərimizin əmanətlərinin bundan sonra da dövlət qayğısı ilə əhatə olunacağı, daim diqqətdə saxlanacağı bildirilib.