09.10.2024

Sənin Qəhrəmanın - Vətən müharibəsi ilə əlaqədar əlilliyi olan Xəqani Muradov

Azərbaycan Dövlət Sərhəd Xidmətinin Sərhəd Qoşunlarının əsgəri, Vətən müharibəsi əlili Xəqani Asim oğlu Muradov 2001-ci ildə Abşeron rayonu, Xırdalan şəhərində anadan olub. Orta təhsili bitirdikdən sonra həqiqi hərbi xidmətə yollanıb.

Xəqani 44 günlük Vətən müharibəsi zamanı Cəbrayıl, Qubadlı, Zəngilan rayonları və Hadrut qəsəbəsinin azadlığı uğrunda gedən döyüşlərdə fəal iştirak edib. O, Qubadlı rayonu uğrunda gedən döyüşlər zamanı yaralanıb. 

Prezident İlham Əliyevin müvafiq Sərəncamlarına əsasən “Hərbi xidmətlərə görə" medalı, həmçinin "Vətən müharibəsi iştirakçısı", "Qubadlının azad olunmasına görə" və “Cəbrayılın azad olunmasına görə” medalları ilə təltif edilib. 

Xəqani 2021-ci ildə Əmək və Əhalinin Sosial Müdafiəsi Nazirliyi tərəfindən Abşeron rayonunda yerləşən yeni yaşayış kompleksində 2 otaqlı, tam təmirli mənzillə təmin olunub.