“Təhsildə sosial iş xidməti” mövzusunda daha bir məktəbdə maarifləndirici görüş keçirilib

Əmək və Əhalinin Sosial Müdafiəsi Nazirliyinin tabeliyində Sosial Xidmətlər Agentliyinin əməkdaşları tərəfindən Bakı şəhəri, Nəsimi rayonunda yerləşən 8 saylı tam orta məktəbdə “Təhsildə sosial iş xidməti” mövzusunda maarifləndirici tədbir keçirilib.
Görüşdə məktəbin müəllim heyəti, məktəb psixoloqları, 9 və 10-cu sinif şagirdləri, eləcə də onların valideynləri iştirak ediblər.
Agentliyin Səyyar və yarımstasionar sosial xidmətlərin təşkili departamentinin əməkdaşları Agentliyin fəaliyyəti, “Təhsildə sosial iş xidməti”, həmçinin uşaq hüquqlarının müdafiəsi, bullinqin səbəbləri və onunla mübarizə yolları, şagirdlərin hüquq və vəzifələrindən düzgün istifadə mövzularında təqdimatlar ediblər.
Sonda iştirakçılarla mövzu ətrafında fikir mübadiləsi aparılıb, suallar cavablandırılıb və müvafiq istiqamətlərdə izahatlar verilib.