Zorakılıq hallarının qarşısının alınması mövzusunda maarifləndirici görüş təşkil edilib

Əmək və Əhalinin Sosial Müdafiəsi Nazirliyinin tabeliyində Sosial Xidmətlər Agentliyinin təşkilatçılığı ilə bölgələrimizdə keçirilən maarifləndirici görüşlər çərçivəsində uşaqlar və yeniyetmələr arasında zorakılıq hallarının qarşısının alınması mövzusunda tədbir təşkil edilib. Mingəçevir şəhər Noel Ahəngari adına 13 nömrəli tam orta məktəbdə keçirilən tədbirdə müəllimlər və şagirdlər iştirak ediblər.  

Görüş zamanı Sosial Xidmətlər Agentliyinin fəaliyyət istiqamətləri barədə ətraflı məlumat verilib. Eyni zamanda, məişət zorakılığının növləri, onun psixoloji və sosial fəsadları, zorakılıq halları ilə qarşılaşdıqda müraciət edilə biləcək qurumlar və mövcud dəstək mexanizmləri barədə təqdimatlar edilib. 

Şagirdlərə öz hüquqlarının qorunması, təhlükəsiz davranış qaydaları və sağlam ünsiyyət bacarıqları ilə bağlı tövsiyələr verilib, onların sualları cavablandırılıb. 

Sonda mövzu ilə bağlı videoçarx təqdim edilib.