18 yaşınadək əlilliyi müəyyən edilmiș şəxslər üçün Şamaxıya ekskursiya təşkil edilib

Əmək və Əhalinin Sosial Müdafiəsi Nazirliyinin tabeliyində Sosial Xidmətlər Agentliyinin 1 və 2 saylı 18 yaşınadək əlilliyi müəyyən edilmiș şəxslər üçün sosial xidmət müəssisələrinin sakinləri üçün Şamaxıya ekskursiya təşkil edilib. 

Ekskursiya Nəsirəddin Tusi adına Şamaxı Astrofizika Rəsədxanasına və Alpaka fermasına təşkil edilib. İştirakçılar əvvəlcə Rəsədxananın nəzdində fəaliyyət göstərən Astronomiya Muzeyi və teleskoplarla tanış olublar. 

Sonra sosial xidmət müəssisəsinin sakinləri Alpaka fermasında heyvanlarla yaxından tanış olub, onları həvəslə yemləyiblər. Alpakaların dostca və sevimli davranışları uşaqlara xoş təəssüratlar bəxş edib. 

Ekskursiyanın məqsədi xüsusi qayğıya ehtiyacı olan uşaqların sosial adaptasiyasına dəstək verməkdir. 

Sosial Xidmətlər Agentliyinin 18 yaşınadək əlilliyi müəyyən edilmiș şəxslər üçün 2 sosial xidmət müəssisəsi fəaliyyət göstərir. Müəssisədə uşaqlara müəyyən edilmiş rejimə və fərdi iş planına uyğun xidmət göstərilir.