05.04.2024

Regional DOST mərkəzləri ilə yanaşı onların filialları da yaradılır

Hazırda Regional DOST mərkəzləri şəbəkəsinin ölkə boyu genişləndirilməsi işləri davam edir. Eyni zamanda, bu mərkəzlərlə yanaşı, ətraf rayonlarda DOST filialları da yaradılır. Bunu DOST Agentliyinin Müşahidə Şurasının növbəti iclasında Şuranın sədri, əmək və əhalinin sosial müdafiəsi naziri Sahil Babayev bildirib. 

Prezident İlham Əliyevin Fərmanı ilə 2019-cu ilin may ayından sonra artıq 7 DOST mərkəzinin açıldığı, ötən dövrdə bu mərkəzlərdə 2,2 milyon nəfərə xidmət göstərildiyi,  bu xidmətlərdən vətəndaş məmnunluğu səviyyəsinin 98,2 faiz olduğu bildirilib.

Birinci vitse-prezident Mehriban xanım Əliyevanın təşəbbüsü olan DOST konsepsiyasının sosial sahələr üzrə 159 xidmətin “bir pəncərə”dən, operativ, şəffaf, müasir, innovativ əsasda göstərilməsinə imkan verdiyi vurğulanıb. Naxçıvan, Şuşa, Quba, Sabirabad, Sumqayıt, Gəncə və Masallıda DOST infrastrukturunun qurulması üçün layihə, təmir-tikinti işlərinin aparılmaqda olduğu qeyd edilib.

Bildirilib ki, Azərbaycanın uğurlu sosial islahat nümunəsi olan DOST modeli beynəlxalq səviyyədə də yüksək qiymətləndirilir və ötən dövrdə DOST Agentliyi bir çox beynəlxalq mükafat və sertifikatla təltif edilib. 

Həmçinin qeyd olunub ki, hazırda bir çox ölkələr DOST təcrübəsini tətbiq etməyə maraq göstərir və bu sahədə onlarla təcrübəmizin bölüşülməsi üçün müvafiq işlər görülür.

İclasda DOST Agentliyinin İdarə Heyətinin sədri Fərid Məmmədov Agentliyin fəaliyyətinə, cümlədən 2024-cü ilin ilk rübündə əhaliyə göstərilən DOST xidmətlərinə, qurumun 2023-2026-ci ilin Strateji Planının icrasına dair təqdimatla çıxış edib.

Müşahidə Şurasının iclasında DOST Agentliyinin fəaliyyəti ilə bağlı məsələlər, habelə DOST konsepsiyası üzrə strateji hədəflərə doğru aparılan işlər və qarşıda duran vəzifələr müzakirə olunub.