“Uşaq hüquqları aylığı” çərçivəsində məktəblilərlə növbəti maarifləndirici görüş keçirilib

Əmək və Əhalinin Sosial Müdafiəsi Nazirliyinin tabeliyində Sosial Xidmətlər Agentliyinin təşkilatçılığı ilə Xəzər rayonu Binə qəsəbəsində yerləşən 218 nömrəli tam orta məktəbdə “Uşaq hüquqlarının müdafiəsinin onların psixososial inkişafına təsiri” mövzusunda maarifləndirici tədbir keçirilib. 
“Uşaq hüquqları aylığı” çərçivəsində 8-ci və 9-cu sinif şagirdləri üçün təşkil edilən görüşdə Sosial Xidmətlər Agentliyinin əməkdaşları tərəfindən Agentliyin fəaliyyəti, “Təhsildə sosial iş” layihəsi, məişət zorakılığı və onun qarşısının alınması, məktəbli yaş dövrünün psixoloji xüsusiyyətləri və uşaq hüquqları, uşaq hüquqlarının müdafiəsi istiqamətlərində təqdimatlar edilib. 
Tədbirin əsas məqsədi uşaqların sosial müdafiəsi, onların hüquqlarının təmin edilməsi, uşaqlara diqqət və qayğının təşviqi, onlara qarşı pis rəftarın və zorakılığın qarşısının alınması, həmçinin ailələrin də cəlb edilməsi yolu ilə bu sahədə məlumatlılığın artırılmasıdır. 
Sonda şagirdlərin sualları cavablandırılıb və mövzu ətrafında geniş müzakirələr aparılıb.