Vətən müharibəsi şəhidlərinin övladlarının Milli Azərbaycan Tarixi Muzeyinə ekskursiyası təşkil edilib

Əmək və Əhalinin Sosial Müdafiəsi Nazirliyinin tabeliyində Sosial Xidmətlər Agentliyinin təşkilatçılığı ilə Vətən müharibəsi şəhidlərinin övladlarının Milli Azərbaycan Tarixi Muzeyinə ekskursiyası təşkil edilib. 
44 günlük Vətən müharibəsinin üçüncü ildönümü münasibətilə təşkil edilən ekskursiyada şəhidlərimizin 20-dən çox övladı iştirak edib. 
Qonaqlara muzeyin tarixi, eləcə də Azərbaycan tarixini əks etdirən minlərlə  eksponatın qorunub saxlanıldığı muzey fondları barədə ətraflı məlumat verilib. Bildirilib ki, muzeyin fondlarında 300 mindən artıq maddi abidə qorunur. 
Milli Azərbaycan Tarixi Muzeyinin tariximizin bütün dövrlərinə aid maddi mədəniyyət nümunələrinin toplanması, öyrənilməsi, nümayişi və təbliği istiqamətində gördüyü işlərdən danışılıb. 
Sonra şəhidlərimizin yadigarları görkəmli xeyriyyəçi Hacı Zeynalabdin Tağıyevin ev-muzeyində olublar. Azyaşlıların diqqətinə çatdırılıb ki, muzeydə H.Z.Tağıyevin sahibkarlıq və ictimai fəaliyyəti, Azərbaycanda və onun hüdudlarından kənarda gördüyü xeyriyyə işləri, ailəsi haqqında məlumatları əks etdirən materiallar  yerləşdirilib. 
Ekskursiya şəhid övladlarının böyük marağına səbəb olub və onlarda xoş təəssüratlar yaradıb.