Xaçmazda insan alverinə qarşı mübarizə mövzusunda maarifləndirici tədbir keçirilib

Əmək və Əhalinin Sosial Müdafiəsi Nazirliyinin tabeliyində Sosial Xidmətlər Agentliyinin təşkilatçılığı ilə Xaçmaz şəhəri Abamüslüm Səlimov adına 7 nömrəli tam orta məktəbdə “İnsan alverinə qarşı mübarizə” mövzusuna həsr edilən tədbir keçirilib. Görüşdə Xaçmaz Rayon İcra Hakimiyyəti, Rayon Polis Şöbəsi, Reabilitasiya Mərkəzi və Təhsil Sektorunun nümayəndələri, eləcə də məktəbin yuxarı sinif şagirdləri iştirak ediblər.

Tədbirdə şagirdlərə insan alverinin mahiyyəti, onun fəsadları, ondan qorunma yolları, təhlükəli hallarla qarşılaşdıqda hansı qurumlara müraciət etməli olduqları barədə ətraflı məlumat verilib. Çıxışçılar insan alverinin cəmiyyət üçün təhlükəli sosial problem olduğunu vurğulayaraq, hər kəsin, xüsusilə də gənclərin maarifləndirilməsinin vacibliyini qeyd ediblər.

Bu kimi görüşlər gənclər arasında hüquqi maarifləndirmənin gücləndirilməsi və potensial təhlükələrə qarşı hazırlıqlı olmalarının təmin olunması baxımından böyük əhəmiyyət daşıyır.

Tədbir interaktiv müzakirələrlə davam edib, şagirdləri maraqlandıran suallar cavablandırılıb.