Yasamal Sosial Xidmət Mərkəzində “Açıq qapı” günü keçirildi

Əmək və Əhalinin Sosial Müdafiəsi Nazirliyinin tabeliyində Sosial Xidmətlər Agentliyinin Bakının Yasamal rayonunda yerləşən Sosial Xidmət Mərkəzində “Açıq qapı” günü keçirilib. 

Xüsusi qayğıya ehtiyacı olan şəxslərə göstərilən sosial reabilitasiya xidmətləri ilə bağlı məlumatlılığın artırılması məqsədi ilə təşkil edilən tədbirdə mərkəzin ixtisaslı mütəxəssisləri və valideynlər iştirak ediblər. 

Görüş iştirakçılarına məlumat verilib ki, Mərkəzdə sosial işçi, psixoloq, sosial pedaqoq, loqoped və aktiv terapevt tərəfindən xüsusi qayğıya ehtiyacı olan şəxslərin reabilitasiya ehtiyaclarının qiymətləndirilməsi aparılır. 

Onlarda ünsiyyət, özünəxidmət və sadə əmək vərdişlərinin formalaşması, çatışmazlıqların korreksiyası, onların sosial statusunun bərpa edilməsi və cəmiyyətə inteqrasiyası təmin edilir. 

Sosial Xidmət Mərkəzində həmçinin digər həssas kateqoriyadan olan şəxslərə (repatriantlar, probasiya qeydiyyatında olan, penitensiar cəzaçəkmə müəssisəsindən azad olunmuş şəxslər və b.) sosial-psixoloji yardım xidməti göstərilir, onların cəmiyyətə uğurlu inteqrasiyası üçün mühüm dəstək tədbirləri görülür. 

Burada, həmçinin beynəlxalq təcrübəyə əsaslanan metodikalarla uşaqların sosial inkişafına nail olunmaqla yanaşı, valideynlərə də sosial-məsləhət yardımı xidməti göstərilir. 

Keçən ilin iyun ayından fəaliyyət göstərən Yasamal Sosial Xidmət Mərkəzində hazırda 34 uşağa xidmət göstərilir. Hazırda Agentliyin 5 Sosial Xidmət Mərkəzində ümumilikdə 264 nəfər xidmətlərlə əhatə olunur.