Yetkinlik yaşına çatmayan 20 məhkum sosial-psixoloji yardım xidmətinə cəlb olunacaq

Əmək və Əhalinin Sosial Müdafiəsi Nazirliyinin tabeliyində Sosial Xidmətlər Agentliyi Ədliyyə Nazirliyinin Penitensiar xidmətinin Yetkinlik Yaşına Çatmayanlar üçün Tərbiyə Müəssisəsində məhkumlarla növbəti görüş təşkil edib. 

Görüşdə Agentliyin fəaliyyət istiqamətləri ilə bağlı təqdimatlar edilib. Yetkinlik yaşına çatmayan məhkumların azad edildikdən sonra sosial mühitə uyğunlaşdırılması, hüquq və azadlıqlarının qorunması sahəsində qurumun gördüyü işlər qeyd olunub. Habelə həmin şəxslərə göstərilən sosial-psixoloji, tibbi-sosial, sosial-məsləhət yardımı və sosial-məişət xidmətləri haqqında məlumatlar verilib. 

İştirakçıların diqqətinə çatdırılıb ki, bu kateqoriyadan olan şəxslərə yardımlar könüllülük prinsipi və şəxsin razılığı əsasında həyata keçirilir. Cəzaçəkmədən azad olunan şəxslərin ailələrinə səfərlər təşkil olunur və qiymətləndirmənin nəticəsindən asılı olaraq onlar müvafiq xidmətlərlə əhatə olunurlar. 

Sonda yetkinlik yaşına çatmayan 20 məhkumun anket sorğusu əsasında qiymətləndirməsi aparılıb. Azadlığa çıxdıqdan sonra onların sosial-psixoloji yardım xidmətinə cəlb edilməsi nəzərdə tutulur.